GEBED VIR DIE WEEK – MAANDAG 17 JUNIE 2024
RCL JAAR B – VIERDE WEEK VAN KONINKRYKSTYD
(Gebed na aanleiding van Psalm 20)
Waar kom ons beskerming vandaan, Here?
God van Jakob, in u Naam is beskerming.
Ons roem u Naam, Here ons God.
Ons verlang na u hulp uit u heiligdom.
Ons begeer u antwoord as ons roep.
Here, ons erken u heerskappy.
God van Jakob, ons bid dié week vir ons regeerders.
Ons beleef verrassende verskuiwings in politieke leierskap.
Die politieke uitkoms is bewys van u verlossing, so glo ons.
Daarom ons gebed, Here: beskerm tog die koning! (Die president)
Ons God, ons het u werke in ons land gesien.
Ons juig oor wat ons beleef as u uitkoms vir ons, Here.
Ons roem u Naam voor mense, God van Suid-Afrika.
U hét geantwoord toe ons U aangeroep het.
Ons weet nou U antwoord ons uit die hemel.
Ons kies om U te vertrou, ons God.
Here ons God, ons moet vorentoe beweeg.
En, daar is vir ons opsies.
Party steun op mag en afdreiging.
Maar ons – steun op u Naam, God van Jakob.
Nou bid ons met hernude geloof, ons God.
Here, laat ons, u koninkrykskinders, u wil begeer.
Mag ons planne ooreenstem met u planne vir ons.
Gee ons leiers u wysheid en begeerte om u wil te doen.
Maak die harte van ons mense sag vir mekaar.
Here, ons vertroue is in die Naam van ons God.
Amen